ఉరవకొండ నూతన గ్రామీణ సీఐ ఈరన్నకు అభినందనలు
మర్యాదపూర్వకంగా కలిసి శుభాకాంక్షలు తెలిపిన జర్నలిస్టులు, రాజకీయ నాయకులు, ప్రజాసంఘాల ప్రతినిధులు
ఉరవకొండ, సెప్టెంబర్ 25: ఉరవకొండ గ్రామీణ నూతన సర్కిల్ ఇన్‌స్పెక్టర్ (సీఐ)గా బాధ్యతలు స్వీకరించిన ఈరన్నను శుక్రవారం పలువురు జర్నలిస్టులు, వివిధ రాజకీయ పార్టీల నాయకులు, ప్రజాసంఘాల ప్రతినిధులు మర్యాదపూర్వకంగా కలిసి అభినందనలు తెలిపారు. సీఐగా బాధ్యతలు స్వీకరించిన సందర్భంగా ఆయనకు పుష్పగుచ్ఛాలు అందజేసి శుభాకాంక్షలు తెలిపారు.
జర్నలిస్టు ఫెడరేషన్ నేతల శుభాకాంక్షలు
ఉరవకొండ జర్నలిస్టు ఫెడరేషన్ గౌరవ అధ్యక్షులు, సీనియర్ రిపోర్టర్ మాలపాటి శ్రీనివాసులు, డీ. బాలచంద్ర నాయుడు, జిల్లా సహ కార్యదర్శి మీనుగ మధుబాబు స్థానిక పోలీస్ స్టేషన్‌లో సీఐ ఈరన్నను కలిసి పూలమాలతో సత్కరించారు.
ఈ సందర్భంగా జర్నలిస్టు ఫెడరేషన్ నాయకులు మాట్లాడుతూ.. గ్రామీణ ప్రాంతాల్లో శాంతిభద్రతల పరిరక్షణకు పోలీసులు చేస్తున్న సేవలు అభినందనీయమన్నారు. ప్రజలకు, ముఖ్యంగా బాధితులకు పోలీసులు ఎల్లప్పుడూ అందుబాటులో ఉండి, వారి సమస్యలను పరిష్కరించేలా చర్యలు తీసుకోవాలని కోరారు.
గ్రామీణ ప్రాంతాల్లో ప్రజలు ఎదుర్కొంటున్న సమస్యలను గుర్తించి, ప్రజలతో మమేకమై పనిచేయాలని సీఐ ఈరన్నను వారు విజ్ఞప్తి చేశారు. పోలీస్ శాఖకు, ప్రజలకు మధ్య సత్సంబంధాలు మరింత బలపడేలా చర్యలు తీసుకోవాలని సూచించారు.
ముస్తూరు గ్రామానికి చెందిన సీనియర్ టీడీపీ నాయకులు నెట్యం రాంబాబు, ఓబులేసు తదితరులు సీఐ ఈరన్నను కలిసి పూలబొకే అందజేసి శుభాకాంక్షలు తెలిపారు.
అలాగే స్థానిక ఎమ్మార్పీఎస్ నాయకులు, ఇతర ప్రజాసంఘాల ప్రతినిధులు కూడా సీఐ ఈరన్నను మర్యాదపూర్వకంగా కలిసి పూలమాలలు వేసి, శాలువాలు కప్పి ఘనంగా సన్మానించారు. నూతన బాధ్యతల్లో ఆయన విజయవంతంగా పనిచేయాలని ఆకాంక్షించారు.
ప్రజల సమస్యలపై తక్షణ స్పందన
తనను కలిసి అభినందనలు తెలిపిన జర్నలిస్టులు, రాజకీయ నాయకులు, ప్రజాసంఘాల ప్రతినిధులకు సీఐ ఈరన్న కృతజ్ఞతలు తెలిపారు. గ్రామీణ ప్రాంతంలో చట్టం, న్యాయం అందరికీ సమానంగా అందేలా చర్యలు తీసుకుంటానని చెప్పారు.
శాంతిభద్రతల పరిరక్షణతో పాటు ప్రజల సమస్యలపై తక్షణమే స్పందిస్తూ పోలీస్ శాఖపై ప్రజలకు నమ్మకం కలిగేలా పనిచేస్తానని ఈ సందర్భంగా సీఐ ఈరన్న పేర్కొన్నారు.