అమరావతి: అంగన్వాడీ కేంద్రాల ద్వారా అందుతున్న సేవలపై ప్రజలకు విస్తృత అవగాహన కల్పించడంతో పాటు చిన్నారులు, గర్భిణులు, బాలింతల్లో పోషకాహారంపై చైతన్యం తీసుకురావడమే లక్ష్యంగా ఆంధ్రప్రదేశ్ ప్రభుత్వం ప్రత్యేక కార్యక్రమాన్ని నిర్వహిస్తోంది. మహిళా అభివృద్ధి మరియు శిశు సంక్షేమ శాఖ, ఆరోగ్య మరియు కుటుంబ సంక్షేమ శాఖల సంయుక్త ఆధ్వర్యంలో ‘అంగన్వాడీ ఉత్సవం–సేవా సంకల్ప అభియాన్’ కార్యక్రమాన్ని నిర్వహిస్తున్నారు.
పోషణ్ అభియాన్‌లో భాగంగా సెప్టెంబర్ 25 నుంచి అక్టోబర్ 7, 2026 వరకు రాష్ట్రవ్యాప్తంగా ఈ ప్రత్యేక కార్యక్రమాలు కొనసాగనున్నాయి. అంగన్వాడీ కేంద్రాల ద్వారా చిన్నారులు, గర్భిణులు, బాలింతలకు అందుతున్న సేవలను ప్రజలకు మరింత చేరువ చేయడం, వాటి ప్రాధాన్యతను వివరించడం కార్యక్రమం ప్రధాన ఉద్దేశంగా అధికారులు పేర్కొన్నారు.
ఉత్సవాల్లో భాగంగా రాష్ట్రంలోని వివిధ అంగన్వాడీ కేంద్రాల్లో ప్రత్యేక ప్రదర్శనలు, అవగాహన సదస్సులు, సాంస్కృతిక కార్యక్రమాలను నిర్వహిస్తున్నారు. పోషకాహారం, ఆరోగ్యం, పిల్లల సంరక్షణకు సంబంధించిన అంశాలపై ప్రజలకు అవగాహన కల్పించేలా కార్యక్రమాలను రూపొందిస్తున్నారు.
స్థానిక అంగన్వాడీ కార్యకర్తలు, ఆయాలు కార్యక్రమాల్లో చురుకుగా పాల్గొంటున్నారు. ఆయా కేంద్రాల్లో పూజా కార్యక్రమాలతో పాటు పోషకాహార వంటకాల ప్రదర్శనలు నిర్వహిస్తున్నారు. స్థానిక ప్రజలను కార్యక్రమాల్లో భాగస్వాములను చేస్తూ అంగన్వాడీ కేంద్రాల సేవలపై అవగాహన కల్పిస్తున్నారు.
అంగన్వాడీ కేంద్రాల సేవలు, పోషకాహార కార్యక్రమాలు, తల్లులు–చిన్నారుల ఆరోగ్య పరిరక్షణకు సంబంధించిన అంశాలను ప్రజలకు సులభంగా అర్థమయ్యేలా వివరించడం ద్వారా కార్యక్రమాన్ని నిర్వహిస్తున్నారు. అక్టోబర్ 7 వరకు కొనసాగనున్న ఈ ఉత్సవాల ద్వారా రాష్ట్రవ్యాప్తంగా అంగన్వాడీ సేవలపై మరింత అవగాహన కల్పించేందుకు అధికారులు చర్యలు చేపట్టారు.