విద్యార్థులతో కలిసి సైకిల్ తొక్కిన ఎమ్మెల్యే అమిలినేని సురేంద్రబాబు

 

కళ్యాణదుర్గం, సెప్టెంబర్ 28: గ్రామీణ ప్రాంత విద్యార్థుల విద్యాభ్యాసానికి రవాణా ఇబ్బందులు అడ్డంకిగా మారకూడదనే లక్ష్యంతో చేపట్టిన ‘అమిలినేని విద్యాచక్రం’ కార్యక్రమంలో భాగంగా కళ్యాణదుర్గం నియోజకవర్గంలో 7,300 మంది విద్యార్థులకు ఉచిత సైకిళ్లను అందజేస్తున్నారు. ఈ కార్యక్రమంలో భాగంగా కళ్యాణదుర్గం పట్టణంలోని కరణం చిక్కప్ప క్రీడామైదానంలో నిర్వహించిన కార్యక్రమంలో ఎమ్మెల్యే అమిలినేని సురేంద్రబాబు విద్యార్థులతో కలిసి సైకిల్ తొక్కి సందడి చేశారు.

విద్యార్థులతో మమేకమైన ఎమ్మెల్యే వారితో కలిసి సైకిల్ తొక్కుతూ ఉత్సాహపరిచారు. అనంతరం విద్యార్థులకు సైకిళ్లను అందజేశారు. 9వ, 10వ తరగతులతో పాటు ఇంటర్మీడియట్ చదువుతున్న గ్రామీణ ప్రాంత విద్యార్థుల ప్రయాణ ఇబ్బందులను తగ్గించేందుకు ఈ కార్యక్రమాన్ని చేపట్టినట్లు నిర్వాహకులు తెలిపారు.

గ్రామీణ ప్రాంతాల్లోని కొందరు విద్యార్థులు పాఠశాలలు, కళాశాలలకు వెళ్లేందుకు ప్రతిరోజూ దూర ప్రాంతాల నుంచి నడిచి వెళ్లాల్సి వస్తున్న పరిస్థితిని దృష్టిలో ఉంచుకుని సైకిళ్ల పంపిణీ చేపట్టినట్లు వెల్లడించారు. సైకిల్ అందుబాటులో ఉండటం వల్ల విద్యార్థులు పాఠశాలలు, కళాశాలలకు సులభంగా చేరుకోవడంతో పాటు ప్రయాణ సమయం కూడా ఆదా అవుతుందని పేర్కొన్నారు.

విద్యార్థులతో కలిసి సైకిల్ తొక్కుతున్న ఎమ్మెల్యే అమిలినేని సురేంద్రబాబు.

ఎస్సార్సీ ట్రస్ట్ సహకారంతో సుమారు రూ.5 కోట్ల వ్యయంతో 7,300 సైకిళ్లను నియోజకవర్గంలోని అర్హత కలిగిన విద్యార్థులకు దశలవారీగా అందజేస్తున్నట్లు ఇప్పటికే ప్రకటించారు. ఈ కార్యక్రమం అమలులో ఎస్సార్సీ సంస్థలో పనిచేస్తున్న సుమారు 7,000 మంది ఉద్యోగుల సహకారం ఉందని నిర్వాహకులు తెలిపారు.

కరణం చిక్కప్ప పాఠశాల, బాలికల ఉన్నత పాఠశాల, నార్త్ ఉన్నత పాఠశాల, మోడల్ స్కూల్, జూనియర్ కళాశాలలకు చెందిన విద్యార్థులు, వారి తల్లిదండ్రులు కార్యక్రమంలో పాల్గొన్నారు. విద్యార్థులకు సైకిళ్లను అందజేసే సమయంలో తల్లిదండ్రులు, ఉపాధ్యాయులు కార్యక్రమాన్ని అభినందించారు.

కార్యక్రమంలో ఎస్సార్సీ చైర్మన్ ముత్తినేని రాజగోపాల్, దేవినేని వెంకటేష్, మహీధర్ రెడ్డి, ఎస్సార్సీ ఎండీ అమిలినేని యశ్వంత్, ముత్తినేని రాహుల్ ఆదిత్య, దేవినేని అవినాష్ తదితరులు పాల్గొన్నారు. స్థానిక ప్రజాప్రతినిధులు, టీడీపీ నాయకులు, విద్యాశాఖకు చెందిన అధికారులు, ఉపాధ్యాయులు కూడా హాజరయ్యారు.

విద్యార్థులు చదువుపై దృష్టి సారించి ఉన్నత విద్యను అభ్యసించాలని, తల్లిదండ్రులు, ఉపాధ్యాయులకు మంచి పేరు తీసుకురావాలని కార్యక్రమంలో సూచించారు. గ్రామీణ ప్రాంతాల నుంచి విద్య కోసం పట్టణాలకు వచ్చే విద్యార్థుల ప్రయాణ సమస్యలను తగ్గించడంలో ఈ సైకిళ్లు ఉపయోగపడతాయని నిర్వాహకులు పేర్కొన్నారు.