ఈ సందర్భంగా ఆయన మాట్లాడుతూ, 12వ శతాబ్దంలోనే సమాజంలో నెలకొన్న అసమానతలను రూపుమాపేందుకు బసవన్న చేసిన కృషి చరిత్రాత్మకమని తెలిపారు. కుల వివక్షను వ్యతిరేకించి, ప్రతి మనిషి సమానమేనని ఆయన ఇచ్చిన సందేశం నేటికీ ప్రాసంగికమని అభిప్రాయపడ్డారు.
“దయయే ధర్మానికి మూలం” అనే బసవన్న బోధనను గుర్తుచేస్తూ, సకల జీవుల పట్ల దయ కలిగి ఉండటమే నిజమైన ధర్మమని ఆయన స్పష్టం చేశారు. కేవలం సిద్ధాంతాలకే పరిమితం కాకుండా, సమాజంలోని అన్ని వర్గాల వారికి ఇష్టలింగ ప్రదానం ద్వారా ఆధ్యాత్మిక సమానత్వాన్ని తీసుకువచ్చిన ఘనత బసవన్నదేనని పేర్కొన్నారు.
వృత్తి జీవితంలో బసవన్న బోధనలు ఎంతో స్ఫూర్తినిస్తాయని ఉక్కీసుల గోపాల్ తెలిపారు. “కాయకవే కైలాస” అనే సిద్ధాంతం తన పనిలో నిరంతరం ప్రేరణగా నిలుస్తోందని ఆయన అన్నారు. శ్రమను దైవంగా భావించి పనిచేయాలనే సందేశం సమాజ అభివృద్ధికి కీలకమని పేర్కొన్నారు.
మహిళా సాధికారతకు బసవన్న చేసిన కృషిని కూడా ఆయన గుర్తుచేశారు. ‘అనుభవ మంటపం’ ద్వారా మహిళలకు సామాజిక, ఆధ్యాత్మిక చర్చల్లో భాగస్వామ్యం కల్పించడం ద్వారా ఆయన అప్పట్లోనే ప్రజాస్వామ్య భావనకు పునాది వేశారని తెలిపారు.
అన్ని వర్గాల ప్రజలను ఒకే వేదికపైకి తీసుకువచ్చి “మానవ కులం” అనే భావనను బలపరిచిన మహనీయుడిగా బసవన్న నిలిచారని ఆయన అన్నారు. ఆయన చూపిన సత్యం, ధర్మం, అహింస మార్గాల్లో నడవడమే నిజమైన నివాళి అని ఉక్కీసుల గోపాల్ పేర్కొన్నారు.