దేవుడి సొమ్ము నమిలేసేందుకు కొందరు కిలాడీలు ఎలా స్కెచ్ వేస్తారో.. చట్టాన్ని చేతుల్లోకి తీసుకుని ప్రభుత్వ ఉద్యోగులే ఎలా ల్యాండ్ గ్రాబింగ్కు పాల్పడతారో చెప్పడానికి ఉరవకొండ గవిమఠం సంస్థాన భూముల వ్యవహారమే నిదర్శనం. జగద్గురు కరిబసవ రాజేంద్ర స్వామి పేరిట ఉన్న కోట్లాది రూపాయల దేవస్థాన భూములను ఒక ఈఓ (EO) తన కుటుంబంతో కలిసి అడ్డగోలుగా ఆక్రమించుకోవడంపై సుదీర్ఘ న్యాయపోరాటం నడిచింది. ఈ నేపథ్యంలో విజయవాడ దేవాదాయ ధర్మాదాయ శాఖ కమిషనర్ ఆదేశాల మేరకు శనివారం అధికారులు రంగంలోకి దిగి భూములను పరిశీలించి, హెచ్చరిక బోర్డులు ఏర్పాటు చేయడం స్థానికంగా తీవ్ర సంచలనం రేకెత్తిస్తోంది.
రూ. 4 కోట్ల భూమి.. ఐదుగురు కబ్జాదారులకు పంపకం!
ఉరవకొండ పట్టణంలోని ప్రముఖ పుణ్యక్షేత్రం శ్రీ గవిమఠం సంస్థానానికి పొరుగు రాష్ట్రమైన కర్ణాటకలోనూ భారీగా భూములు ఉన్నాయి. బళ్లారి జిల్లా, రూపనగుడి తాలూకా, చెళ్ళగురికి (చేళ్లగురికి) గ్రామ పరిధిలో మఠానికి చెందిన అత్యంత విలువైన *22.40 ఎకరాల* భూమి ఉంది. దీని మార్కెట్ విలువ దాదాపు *రూ. 4 కోట్లకు* పైనే ఉంటుంది. ఇంతటి విలువైన దేవుడి భూమిపై గుంతకల్లు పూర్వపు ఈఓ మల్లికార్జున కన్ను పడింది.
అధికారాన్ని అడ్డం పెట్టుకుని, రికార్డులను తారుమారు చేసి.. ఈ 22.40 ఎకరాల భూమిని తన కుటుంబ సభ్యుల పేరిట అక్రమంగా రిజిస్ట్రేషన్ చేయించుకున్నాడు. విచిత్రం ఏమిటంటే.. ఆంధ్రప్రదేశ్కు చెందిన ఈ భూమిని, నిబంధనలకు విరుద్ధంగా కర్ణాటకలోని బళ్లారి సబ్-రిజిస్ట్రార్ కార్యాలయంలో రిజిస్ట్రేషన్ చేయించారు. మొత్తం భూమిని ఐదు సమాన భాగాలుగా (తలా 4.48 ఎకరాలు ) విభజించుకుని అక్రమ పట్టాలు సృష్టించి, అందులో ఏకంగా శనగ పంట సాగు చేయడం ప్రారంభించారు.
ప్రధాన కబ్జాదారుల పేర్లు:
1. *ఈఓ మల్లికార్జున* (గవిమఠం పూర్వపు ఈఓ)
2. *శశికళ* (ఈఓ మల్లికార్జున భార్య)
3. *భాగ్యేశ్వరి* (ఈఓ మల్లికార్జున సోదరి)
4. రుషేంద్ర (ఈఓ మల్లికార్జున సోదరుడు - ఉపాధ్యాయుడు)
5. *మంజునాథ్* (ఈఓ మల్లికార్జున మరో సోదరుడు)
వెలుగులోకి తెచ్చిన లోకాయుక్త పోరాటం.. అధికారుల హైడ్రామా
ఈ భారీ భూ కుంభకోణాన్ని జిల్లా సమాచార హక్కు చట్టం కార్యదర్శి *మీనుగ మధుబాబు* గట్టిగా నిలదీశారు. అధికారుల అండదండలతో సాగుతున్న ఈ అక్రమాన్ని సాక్ష్యాధారాలతో సహా లోకాయుక్త దృష్టికి తీసుకెళ్లారు. దీనిపై తీవ్రంగా స్పందించిన లోకాయుక్త.. నిందితులైన ఈఓ మల్లికార్జున మరియు అతని కుటుంబ సభ్యులపై చీటింగ్ కేసులు నమోదు చేసి, తక్షణమే అరెస్ట్ చేయాలని ఆదేశించింది.
అయితే, లోకాయుక్త ఆదేశాల మేరకు గతంలో అధికారులు కేవలం ఈఓ మల్లికార్జున వాటాకు సంబంధించిన 4.48 ఎకరాల భూమిని స్వాధీనం చేసుకుని బహిరంగ వేలానికి ఏర్పాట్లు చేయగా.. సహాయ కమిషనర్ చిట్టెమ్మ ఆధ్వర్యంలోని స్థానిక సిబ్బంది చివరి నిమిషంలో వేలాన్ని వాయిదా వేసి నిందితులకు కొమ్ముకాసే ప్రయత్నం చేశారు. దీనిపై భక్తులు, లీగల్ సెల్ ప్రతినిధులు తీవ్ర ఆగ్రహం వ్యక్తం చేస్తూ కార్యాలయాన్ని ముట్టడించి ధర్నాకు దిగారు. కబ్జాదారులైన ఐదుగురి పేరిట ఉన్న మొత్తం 22.40 ఎకరాలను జప్తు చేయాలని డిమాండ్ చేశారు.
రంగంలోకి కొత్త యంత్రాంగం.. హెచ్చరిక బోర్డుల ఏర్పాటు!
భక్తుల నిరసనలు, ఉన్నతాధికారుల ఆదేశాల నేపథ్యంలో ఎట్టకేలకు దేవాదాయ శాఖ కదిలింది. దేవాదాయ శాఖ సహాయ కమిషనర్ మరియు మేనేజర్ *గంజి మల్లికార్జున ప్రసాద్* ఆధ్వర్యంలో శనివారం అధికారులు చెళ్ళగురికి గ్రామ పరిధిలోని మఠం భూములను క్షేత్రస్థాయిలో పరిశీలించారు.
కబ్జాదారుల చేతుల్లో ఉన్న మఠం భూములను ఈ క్రింది విధంగా గుర్తించి, దేవాదాయ శాఖ నిబంధనల ప్రకారం వాటి రక్షణకై సదరు స్థలాల్లో *హెచ్చరిక బోర్డులను* పాతడం జరిగింది:
సర్వే నంబర్ 111B:3 ఎకరాల 35 సెంట్లు
సర్వే నంబర్ 114: 19 ఎకరాల 05 సెంట్లు
*(మొత్తం: 22.40 ఎకరాలు)*
ఈ బోర్డుల ఏర్పాటు కార్యక్రమంలో మఠం సిబ్బంది, అర్చకులు మరియు పెద్ద సంఖ్యలో భక్తులు పాల్గొని హర్షం వ్యక్తం చేశారు.
త్వరలో బహిరంగ వేలం
ఈ సందర్భంగా దేవాదాయ శాఖ సహాయ కమిషనర్ గంజి మల్లికార్జున ప్రసాద్ మీడియాతో మాట్లాడుతూ.. మఠం ఆస్తులను కాపాడేందుకు అన్ని రకాల కఠిన చర్యలు తీసుకుంటున్నామని తెలిపారు. ఈఓ మల్లికార్జున కుటుంబం అక్రమంగా హస్తగతం చేసుకున్న ఈ భూములను దేవాదాయ శాఖ ఆధీనంలోకి తెచ్చుకున్నామని, ప్రస్తుతం బోర్డులు నాటిన ఈ భూములకు సంబంధించి త్వరలోనే ప్రభుత్వ నిబంధనల ప్రకారం *బహిరంగ వేలం* నిర్వహించనున్నట్లు ఆయన స్పష్టం చేశారు.
దేవుడి భూమిని అక్రమంగా రిజిస్ట్రేషన్ చేయించుకున్న ఈఓ మల్లికార్జున, శశికళ, భాగ్యేశ్వరి, ఉపేంద్ర, మంజునాథ్లపై చట్టపరమైన చర్యలు తీసుకుంటూనే.. మొత్తం భూమిని తిరిగి మఠం ఖాతాలోకి చేర్చడంతో భక్తుల పోరాటానికి మీనుగ మధు బాబు తొలి విజయం దక్కినట్లయింది.