విడపనకల్లులో బేకరీ దందా: బూజు పట్టిన కేకులే పిల్లలకు ఆహారమా?

 

-ప్రశ్నించిన మహిళపై బేకరీ యాజమాన్యం దౌర్జన్యం.. పోలీసులతో బెదిరింపులు

నిమ్మకు నీరెత్తినట్లు వ్యవహరిస్తున్న తూనికలు, కొలతల శాఖ, ఫుడ్ సేఫ్టీ అధికారులు

విడపనకల్లు

అనంతపురం జిల్లా విడపనకల్లు మండల కేంద్రంలోని 'బెంగళూరు బేకరీ' అక్రమాలు శృతి మించుతున్నాయి. లాభాల కోసం ప్రజల, ముఖ్యంగా పసిపిల్లల ఆరోగ్యంతో చెలగాటమాడుతున్న ఈ బేకరీ తీరుపై స్థానికులు మండిపడుతున్నారు. కుళ్ళిపోయి, బూజు పట్టిన పాత కేకులకు రంగురంగుల క్రీములతో కొత్త మెరుగులు అద్ది తాజావిగా నమ్మించి విక్రయిస్తున్న వైనం తాజాగా వెలుగుచూసింది.

*అసలేం జరిగింది?*

స్థానిక కుటుంబం ఒకటి పిల్లల పుట్టినరోజు వేడుకల కోసం ఈ బేకరీలో కేక్ ఆర్డర్ చేసింది. రాత్రి వేళ కావడంతో తేడా గమనించని పిల్లలు కేక్ తిన్నారు. రుచిలో తేడా ఉండటంతో కొంతమంది పిల్లలు తినడం ఆపేశారు. మిగిలిన కేకును ఉదయం పరిశీలించగా, అది పూర్తిగా గట్టిపడి, బూజు పట్టి, దుర్వాసన వస్తోంది. దీంతో ఆగ్రహించిన సదరు మహిళ బేకరీకి వెళ్లి, "పసిపిల్లల ప్రాణాలతో ఇలా ఆడుకుంటారా?" అని నిలదీసింది.

ప్రశ్నిస్తే బెదిరింపులే..

తప్పును సరిదిద్దుకోవాల్సిన బేకరీ యాజమాన్యం, అందుకు భిన్నంగా ఎదురుదాడికి దిగింది. సదరు మహిళపై దౌర్జన్యానికి దిగడమే కాకుండా, పోలీసులకు ఫోన్ చేసి వారిని పిలిపించి భయభ్రాంతులకు గురిచేయడం స్థానికంగా కలకలం రేపింది.

*అధికారుల నిర్లక్ష్యం ఎవరి కోసం?*

ఈ బేకరీ అక్రమాలపై గతంలో అనేకసార్లు ఫిర్యాదులు, పత్రికా కథనాలు వచ్చినా పరిస్థితి మారలేదు.

 *తూనికలు, కొలతల శాఖ:* బేకరీ ఉత్పత్తులపై గడువు తేదీ ముద్రించాలని 15 రోజుల గడువుతో నోటీసులు ఇచ్చి రెండు నెలలు దాటినా, నేటికీ ఆ నిబంధన అమలు కాలేదు.

 ఫుడ్ సేఫ్టీ విభాగం: ప్రజల ఆరోగ్యాన్ని కాపాడాల్సిన ఆహార భద్రత అధికారులు అన్నీ తెలిసినా చూసీచూడనట్లు వ్యవహరించడం వెనుక మతలబు ఏంటని ప్రజలు ప్రశ్నిస్తున్నారు.

అధికారుల ఉదాసీనత వల్లే యాజమాన్యం ఇంతలా రెచ్చిపోతోందని స్థానికులు ఆరోపిస్తున్నారు. ఇప్పటికైనా ఉన్నతాధికారులు స్పందించి, సదరు బేకరీపై కఠిన చర్యలు తీసుకోవాలని, అవసరమైతే సీజ్ చేయాలని డిమాండ్ చేస్తున్నారు. లేనిపక్షంలో బేకరీ ముందు పెద్ద ఎత్తున ఆందోళనలు చేపడతామని హెచ్చరించారు.