ఉరవకొండ, జూలై 12:
కుల, మత విద్వేషాలను రెచ్చగొట్టే రాజకీయాలకు వైఎస్సార్ కాంగ్రెస్ పార్టీ స్వస్తి పలకాలని జనసేన పార్టీ నియోజకవర్గ ఇంచార్జి గౌతమ్ కుమార్ కోరారు. ఇటీవల కొందరు వ్యక్తులు సామాజిక మాధ్యమాలు, బహిరంగ వేదికలపై ఉప ముఖ్యమంత్రి పవన్ కళ్యాణ్పై వ్యక్తిగత విమర్శలు, అనుచిత వ్యాఖ్యలు చేస్తుండగా, వాటిని వైసీపీ నాయకులు ప్రత్యక్షంగా లేదా పరోక్షంగా సమర్థిస్తున్న తీరు ఆందోళన కలిగిస్తోందని ఆయన ఆరోపించారు.
ఆదివారం విడుదల చేసిన ప్రకటనలో ఆయన మాట్లాడుతూ, ప్రభుత్వ విధానాలు, అభివృద్ధి కార్యక్రమాలు, ప్రజా సమస్యలపై ప్రతిపక్షం ప్రశ్నించడం ప్రజాస్వామ్యంలో సహజమేనని, అయితే ప్రతి అంశాన్నీ కుల, మత కోణంలో చూపిస్తూ సమాజంలో విద్వేషాలను రెచ్చగొట్టే ప్రయత్నాలు చేయడం ప్రమాదకరమని పేర్కొన్నారు.
రాష్ట్రంలో ఇటీవల చోటుచేసుకున్న పలు ఘటనలను రాజకీయ ప్రయోజనాల కోసం కుల, మత రంగులు పులుముతూ వైసీపీ ప్రజలను తప్పుదోవ పట్టించే ప్రయత్నం చేస్తోందని విమర్శించారు. అభివృద్ధి, సంక్షేమం, ప్రజా సమస్యల పరిష్కారాలపై చర్చించకుండా సమాజాన్ని విభజించే రాజకీయాలు చేయడం దురదృష్టకరమని అన్నారు.
హిందూ దేవతలు, జాతీయ నాయకులు, దేశ సార్వభౌమత్వంపై వివాదాస్పద వ్యాఖ్యలు చేసిన వారిని కూడా కొందరు వైసీపీ నాయకులు సమర్థించే విధంగా మాట్లాడటం ప్రజల్లో అనుమానాలకు తావిస్తోందని గౌతమ్ కుమార్ పేర్కొన్నారు. ఇలాంటి వైఖరి సమాజంలో ఉద్రిక్తతలకు దారితీసే ప్రమాదం ఉందని హెచ్చరించారు.
ఇటీవల జరిగిన కొన్ని ఘటనలపై విచారణ కొనసాగుతున్నప్పటికీ, వాటిని కులపరమైన కోణంలో చూపిస్తూ ప్రత్యేక సమావేశాలు నిర్వహించడం సమాజంలో విభేదాలను పెంచే చర్యగా అభివర్ణించారు. నేరం చేసిన వ్యక్తికి కులం, మతం ఆధారంగా మద్దతు ఇవ్వడం సరైన రాజకీయ విధానం కాదని, చట్టం తన పని తాను చేసుకునేలా అన్ని రాజకీయ పార్టీలు సహకరించాలని సూచించారు.
జనసేన పార్టీ అధ్యక్షుడు పవన్ కళ్యాణ్ కుల, మత విభజనలు లేని సమాజ నిర్మాణాన్ని లక్ష్యంగా పెట్టుకున్నారని, ఉప ముఖ్యమంత్రిగా సమాజంలో ఐక్యత, సమానత్వం, సామరస్యాన్ని పెంపొందించే దిశగా పనిచేస్తున్నారని తెలిపారు.
ప్రస్తుత రాష్ట్ర ప్రభుత్వం అభివృద్ధి, సంక్షేమ ఫలాలను అన్ని వర్గాలకు సమానంగా అందించేందుకు కృషి చేస్తోందని, ప్రజలు కూడా విభజన రాజకీయాలను తిరస్కరిస్తున్నారని గౌతమ్ కుమార్ అన్నారు. రాజకీయ పార్టీలు విద్వేషాలను రెచ్చగొట్టే వ్యాఖ్యలకు దూరంగా ఉండి, అభివృద్ధి, పరిపాలన, ప్రజా సమస్యల పరిష్కారాలపై నిర్మాణాత్మక రాజకీయాలు చేయాలని ఆయన పిలుపునిచ్చారు.