ఉరవకొండ, సెప్టెంబర్ 11
ఉరవకొండ నియోజకవర్గం ఇన్చార్జ్, మాజీ ఎమ్మెల్యే, రాష్ట్ర పీఏసీ మెంబర్ శ్రీ వై. విశ్వేశ్వర్ రెడ్డి ఆదేశాల మేరకు శుక్రవారం వైఎస్సార్ కాంగ్రెస్ పార్టీ నాయకులు ఉరవకొండ మండల విద్యుత్ అధికారి (AE) గారిని కలిసి వినతిపత్రం సమర్పించారు.
వైఎస్సార్‌సీపీ జిల్లా ప్రధాన కార్యదర్శి ముత్తులూరు అశోక్ కుమార్, రూరల్ అధ్యక్షులు ఎర్రి స్వామి రెడ్డి, రూరల్ మండల అబ్జర్వర్ డీష్ సురేష్, సమన్వయకర్త ఓబన్న, నింబగల్లు ఎంపీటీసీ ఈశ్వర్, బీమా తదితరుల ఆధ్వర్యంలో ఈ కార్యక్రమం జరిగింది.
వినతిపత్రంలోని ముఖ్య అంశాలు:
* రైతుల ఇబ్బందులు: ఈ సంవత్సరం వర్షాలు లేక పంటలు ఎండిపోయే పరిస్థితి నెలకొంది. అరకొరగా పారుతున్న హంద్రీనీవా, హెచ్.ఎల్.సి కెనాల్ నీటిని వాడుకోవాలన్నా, బోర్లు మరియు బావుల కింద ఉన్న పంటలను కాపాడుకోవాలన్నా విద్యుత్ సరఫరా సరిగ్గా లేక రైతులు తీవ్రంగా నష్టపోతున్నారు.
* మోటార్లు దగ్ధం: లో-వోల్టేజ్ సమస్య కారణంగా పొలాల్లో విద్యుత్ మోటార్లు కాలిపోయి రైతులపై అదనపు భారం పడుతోంది.
* పగటిపూటే త్రీ-ఫేజ్ విద్యుత్ ఇవ్వాలి: రాత్రి వేళల్లో త్రీ-ఫేజ్ విద్యుత్ సరఫరా చేయడం వల్ల రైతులు రాత్రిళ్లు పొలాలకు వెళ్తూ పాముకాట్లకు, విద్యుత్ షాకులకు గురవుతున్నారు. ప్రమాదాలను నివారించడానికి త్రీ-ఫేజ్ విద్యుత్‌ను రాత్రికి బదులు పగటిపూట మాత్రమే ఉచితంగా ఉదయం నుంచే పూర్తిస్థాయిలో అందించాలని కోరారు.
* ప్రజల అవస్థలు: రాత్రి సమయాల్లో విద్యుత్ కోతలు విధించడం వల్ల గ్రామీణ ప్రజలు, చిన్నపిల్లలు, వయోవృద్ధులు తీవ్ర అస్వస్థతకు గురవుతున్నారు.
ఈ సందర్భంగా వైకాపా నాయకులు మాట్లాడుతూ.. విద్యుత్ అధికారులు తక్షణమే స్పందించి సరఫరాను పునరుద్ధరించాలని, ప్రజలు మరియు రైతుల సమస్యలను పరిష్కరించి ఆదుకోవాలని విజ్ఞప్తి చేశారు.