న్యూఢిల్లీ: మొబైల్‌ డేటా అవసరం లేకుండా కేవలం కాల్స్, ఎస్‌ఎంఎస్‌ సేవలను వినియోగించే వారికి మరిన్ని రీఛార్జ్‌ ఎంపికలు అందుబాటులోకి రానున్నాయి. టెలికాం వినియోగదారుల రక్షణ నిబంధనల్లో చేసిన 13వ సవరణను భారత టెలికాం నియంత్రణ సంస్థ (ట్రాయ్) సెప్టెంబర్‌ 22న జారీ చేసింది.
కొత్త నిబంధనల ప్రకారం టెలికాం సంస్థలు డేటా కలిగిన వాయిస్‌, ఎస్‌ఎంఎస్‌ ప్లాన్‌లతో పాటు వాయిస్‌, ఎస్‌ఎంఎస్‌ మాత్రమే ఉండే ప్రత్యేక టారిఫ్‌ వోచర్లు (STVs) కూడా అందించాల్సి ఉంటుంది. ముఖ్యంగా 30 రోజులు లేదా అంతకంటే తక్కువ కాలపరిమితితో డేటా, వాయిస్‌, ఎస్‌ఎంఎస్‌ కలిగిన ప్లాన్‌ను అందిస్తున్నట్లయితే.. అదే కాలపరిమితికి అనుగుణంగా డేటా లేని వాయిస్‌–ఎస్‌ఎంఎస్‌ ప్లాన్‌ను కూడా అందించాలి.
 |
| వాయిస్‌, ఎస్‌ఎంఎస్‌ మాత్రమే వినియోగించే వారికి కొత్త రీఛార్జ్‌ ఎంపికలు |
అదేవిధంగా నెలవారీగా పునరుద్ధరించుకునే అవకాశం ఉన్న వాయిస్‌–ఎస్‌ఎంఎస్‌ ప్లాన్‌ను కూడా అందించాల్సి ఉంటుంది. ఒక నెలలో అదే తేదీ లేకపోతే ఆ నెల చివరి తేదీన పునరుద్ధరణ జరిగేలా నిబంధనలు పేర్కొంటున్నాయి. దీర్ఘకాలిక వాయిస్‌–ఎస్‌ఎంఎస్‌ మాత్రమే ఉండే కనీసం ఒక ప్లాన్‌ను కూడా అందించాల్సి ఉంటుంది.
ప్రస్తుతం జియో, ఎయిర్‌టెల్‌, వొడాఫోన్‌ ఐడియా సహా టెలికాం సంస్థలు వివిధ కాలపరిమితులతో కూడిన ప్లాన్‌లను అందిస్తున్నాయి. కొత్త నిబంధనల అమలుతో డేటా వినియోగం అవసరం లేని వినియోగదారులకు తమ అవసరాలకు అనుగుణంగా రీఛార్జ్‌ చేసుకునే అవకాశాలు పెరగనున్నాయి.
ట్రాయ్ ప్రకారం తక్కువ వ్యవధి వాయిస్‌–ఎస్‌ఎంఎస్‌ ప్లాన్‌ల అందుబాటు పరిమితంగా ఉందని, ముఖ్యంగా డేటా అవసరం లేని వినియోగదారులకు తక్కువ వ్యవధి రీఛార్జ్‌ ఎంపికలు పెంచాల్సిన అవసరం ఉందని తెలిపింది.
అక్టోబర్‌ 21 నుంచి అమలు
ట్రాయ్ 13వ సవరణ నిబంధనలు అధికారిక గెజిట్‌లో ప్రచురితమైన 30 రోజుల తర్వాత అమల్లోకి రానున్నాయి. అందుబాటులో ఉన్న తాజా వివరాల ప్రకారం అక్టోబర్‌ 21, 2026 నుంచి కొత్త నిబంధనలు అమల్లోకి రానున్నాయి.