ఉయ్యూరులో వినాయక మండపంలో ఘనంగా అన్నదాన కార్యక్రమం
ఉయ్యూరు: అన్నదానం గొప్ప సేవా కార్యక్రమమని, ఆకలితో ఉన్న వారికి అన్నం పెట్టడం కంటే గొప్ప మానవతా సేవ మరొకటి లేదని మాజీ ఎమ్మెల్సీ వైవీబీ రాజేంద్రప్రసాద్ అన్నారు. భక్తులు, యువత కలిసి సేవా కార్యక్రమాలు నిర్వహించడం అభినందనీయమని ఆయన పేర్కొన్నారు.
ఉయ్యూరులోని కాకనిపార్క్ సెంటర్‌లో ఏర్పాటు చేసిన వినాయక మండపంలో భక్తుల ఆధ్వర్యంలో అన్నదాన కార్యక్రమాన్ని నిర్వహించారు. ఈ కార్యక్రమానికి మాజీ ఎమ్మెల్సీ వైవీబీ రాజేంద్రప్రసాద్ ముఖ్య అతిథిగా హాజరయ్యారు. ముందుగా వినాయకుడికి ప్రత్యేక పూజలు నిర్వహించి స్వామివారి ఆశీస్సులు తీసుకున్నారు. అనంతరం అన్నదాన కార్యక్రమాన్ని ప్రారంభించారు.
ఈ సందర్భంగా వైవీబీ రాజేంద్రప్రసాద్ మాట్లాడుతూ.. సమాజంలో సేవా భావాన్ని పెంపొందించడంలో ఇలాంటి కార్యక్రమాలు కీలక పాత్ర పోషిస్తాయని అన్నారు. పండుగలను కేవలం ఆధ్యాత్మిక కార్యక్రమాలకే పరిమితం చేయకుండా, పేదలు, అవసరమైన వారికి సహాయం చేసేలా నిర్వహించడం మంచి సంప్రదాయమని పేర్కొన్నారు.
వినాయక చవితి సందర్భంగా భక్తులు, యువత కలిసి అన్నదాన కార్యక్రమాన్ని నిర్వహించడం సంతోషకరమైన విషయమన్నారు. భక్తిశ్రద్ధలతో పాటు సేవా భావాన్ని కూడా ప్రజల్లో పెంపొందించాల్సిన అవసరం ఉందని తెలిపారు.
విఘ్నేశ్వర స్వామి ఆశీస్సులతో ఉయ్యూరు ప్రజలందరికీ మంచి ఆరోగ్యం, సుఖసంతోషాలు కలగాలని ఆయన ఆకాంక్షించారు. ముఖ్యంగా యువతకు మంచి భవిష్యత్తు, విద్యా, ఉద్యోగ రంగాల్లో మంచి అవకాశాలు లభించాలని వినాయకుడిని ప్రార్థించినట్లు తెలిపారు.
అన్నదాన కార్యక్రమంలో స్థానిక ప్రజలు, భక్తులు పెద్ద సంఖ్యలో పాల్గొన్నారు. భక్తులకు నిర్వాహకులు అన్నప్రసాదాన్ని అందించారు. కార్యక్రమం సందర్భంగా వినాయక మండపం వద్ద భక్తిశ్రద్ధలతో సందడి నెలకొంది.
ఈ కార్యక్రమంలో టీడీపీ నేతలు వల్లభనేని సత్యనారాయణ, రత్నం శివప్రసాద్, జంపన శ్రీనివాస్, కిషోర్, తుంగల దేవేంద్రరావు, తుంగల బాబ్జి, శ్రీనివాస్, రామకృష్ణతో పాటు పలువురు భక్తులు, స్థానికులు పాల్గొన్నారు.