:మారిన ప్రభుత్వం.. మారని బాధ్యతా రాహిత్యం! ఉరవకొండ పట్టణ ఎం ఈ ఓ ఈశ్వరప్ప కార్యాలయం ఇప్పుడు వెలవెలబోతోంది. ప్రజల సమస్యలు తీర్చాల్సిన అధికారి కుర్చీకి, ఏళ్ల తరబడి పట్టిన దుమ్ము తప్ప, ప్రజా ప్రతినిధుల జాడ కరువైంది.
విద్యార్థుల భవిష్యత్తును తీర్చిదిద్దాల్సిన విద్యాశాఖ అధికారి, నిత్యం ‘గైర్హాజరు’ పర్వంతో విద్యార్థులను, తల్లిదండ్రులను వీధుల పాలు చేస్తున్నారు. అఖిల భారత ప్రజాతంత్ర విద్యార్థి సమైక్య రాష్ట్ర అధ్యక్షులు సిద్ధూ, నందూ నాయకులు ఆ కార్యాలయానికి వెళ్లగా ఎదురైన దృశ్యం అధికారుల నిర్లక్ష్యానికి పరాకాష్ట.
ఇది పాలనా? లేక నిరంకుశత్వమా?
ప్రైవేట్ పాఠశాలల అక్రమాలు, ఫీజుల దోపిడీ, అడ్డగోలు పుస్తకాల అమ్మకాలపై ఎంఈఓ పర్యవేక్షణ చేయకపోగా, కనీసం కార్యాలయానికి వచ్చే వారికి సమాధానం చెప్పే దిక్కు కూడా లేదు. "మేము దేనికోసం వినతిపత్రం ఇవ్వాలి? ఈ ఖాళీ కుర్చీకా?" అని నేతలు విసిరిన ప్రశ్న, ఇప్పుడు ఉరవకొండలో చర్చనీయాంశంగా మారింది. కార్యాలయ సిబ్బంది కూడా సమాచారం ఇవ్వడంలో విఫలమవ్వడం, అంతా కలిసి ఆడుతున్న ‘అదృశ్య’ నాటకమని స్పష్టమవుతోంది.
సహనం నశిస్తోంది.. చర్యలు తప్పవు!
ప్రజల సొమ్ముతో జీతాలు తీసుకుంటూ, ప్రజలకు అందుబాటులో ఉండలేని అధికారికి పదవిలో ఉండే అర్హత ఉందా? అని విద్యార్థి లోకం ప్రశ్నిస్తోంది.
నిలదీత:బాధ్యత లేని ఎంఈఓపై జిల్లా విద్యాశాఖ ఉన్నతాధికారులు తక్షణమే విచారణ చేపట్టాలి.
అక్రమాలకు అండగా ఉంటూ, విధులను విస్మరిస్తున్న ఎంఈఓ తీరు మారకుంటే, కార్యాలయాన్ని ముట్టడించేందుకు వెనుకాడబోమని నాయకులు రాష్ట్ర అధ్యక్షులు సిద్ధూ,జిల్లా అధ్యక్షులు నందు హెచ్చరించారు.
ప్రజలకు జవాబుదారీగా ఉండాల్సిన బాధ్యత ఎంఈఓ గుర్తించే వరకు ఈ పోరాటం ఆగదని విద్యార్థి సంఘాలు స్పష్టం చేస్తున్నాయి.