ఉరవకొండ,
అనంతపురం జిల్లా ఉరవకొండ నియోజకవర్గంలోని ఆమిద్యాల గ్రామంలో మొహరం వేడుకలు అత్యంత వైభవంగా, భక్తిశ్రద్ధలతో కొనసాగుతున్నాయి. ప్రతి సంవత్సరం ఆనవాయితీగా నిర్వహించే ఈ ఉత్సవాల్లో గ్రామస్తులు, భక్తులు పెద్ద సంఖ్యలో పాల్గొని ఆధ్యాత్మిక వాతావరణాన్ని సృష్టించారు.
డప్పులు, సన్నాయి వాయిద్యాల నాదాల మధ్య నిర్వహించిన మొహరం ఊరేగింపు గ్రామ వీధులన్నింటిలో ఘనంగా సాగింది. అలంకరించిన పీర్లను భక్తులు భక్తిపూర్వకంగా మోసుకుంటూ ఊరేగించగా, గ్రామమంతా భక్తి పారవశ్యంతో కళకళలాడింది. ముఖ్యంగా పురుషులు డప్పుల వాయిద్యాల నడుమ వేట కొడవళ్లను చేతబట్టి చేసిన సంప్రదాయ నృత్యాలు వేడుకలకు ప్రత్యేక ఆకర్షణగా నిలిచాయి.
వేడుకలను తిలకించేందుకు మహిళలు, యువకులు, వృద్ధులు పెద్ద సంఖ్యలో హాజరయ్యారు. పీర్ల దర్శనం కోసం భక్తులు పోటెత్తగా, గ్రామంలో పండుగ వాతావరణం నెలకొంది. మొహరం ఉత్సవాల్లో భాగంగా నిర్వహించిన పానకాల పండుగకు భక్తుల నుంచి విశేష స్పందన లభించింది.
ఈ సందర్భంగా గ్రామ పెద్దలు మాట్లాడుతూ, మత సామరస్యానికి ప్రతీకగా మొహరం వేడుకలు నిలుస్తున్నాయని తెలిపారు. గ్రామస్తుల ఐక్యత, సంప్రదాయాల పరిరక్షణకు ఈ ఉత్సవాలు నిదర్శనమని పేర్కొన్నారు.
శుక్రవారం నిర్వహించనున్న జలధి కార్యక్రమంతో ఈ ఏడాది మొహరం వేడుకలు ముగియనున్నట్లు నిర్వాహకులు వెల్లడించారు. భక్తుల సందడి, సంప్రదాయ కళారూపాల ప్రదర్శనలతో ఆమిద్యాల గ్రామంలో మొహరం ఉత్సవాలు ఘనంగా సాగుతున్నాయి. ఎలాంటి ఘటనలు జరగకుండా ఉరవకొండ పోలీసులు గట్టి ఏర్పాటు నిర్వహించారు.