రూపా నాయక్ తండా గిరిజన పాఠశాలలో ఆకస్మిక తనిఖీ
కోడిగుడ్ల కోత, అపరిశుభ్రతపై హెచ్ఎం, ఏజెన్సీకి హెచ్చరిక
వజ్రకరూరు, జులై 27
మండలంలోని ప్రభుత్వ పాఠశాలల్లో మధ్యాహ్న భోజన పథకం అమలు తీరు అస్తవ్యస్తంగా ఉంటే సహించేది లేదని మండల విద్యాశాఖ అధికారి (ఎంఈఓ-2) తిమ్మప్ప తీవ్రస్థాయిలో హెచ్చరించారు. సోమవారం వజ్రకరూరు మండల పరిధిలోని రూపా నాయక్ తండా ప్రభుత్వ గిరిజన ప్రాథమిక పాఠశాలను ఆయన ఆకస్మికంగా తనిఖీ చేశారు. పాఠశాల రికార్డులను పరిశీలించడంతో పాటు విద్యార్థులకు అందిస్తున్న భోజన నాణ్యతను స్వయంగా పరిశీలించారు.
అసంతృప్తికి దారితీసిన లోపాలు:
ఈ తనిఖీ సందర్భంగా మధ్యాహ్న భోజనం తయారీలో పలు లోపాలను గుర్తించిన ఎంఈఓ, హెచ్ఎంతో పాటు వంట ఏజెన్సీ నిర్వాహకులపై తీవ్ర ఆగ్రహం వ్యక్తం చేశారు.
నాణ్యత లేని వంట:పప్పు సరిగా ఉడకకపోవడం, సాంబారులో వేయాల్సిన కూరగాయలు వేయకపోవడంపై ఆసహనం వ్యక్తం చేశారు.
కోడిగుడ్ల కోత:సోమవారం పాఠశాలలోని మొత్తం 117 మంది విద్యార్థులకు గాను 97 మంది హాజరయ్యారు. అయితే ముగ్గురు విద్యార్థులకు కోడిగుడ్లు ఇవ్వకపోవడాన్ని ఎంఈఓ గుర్తించారు. దీనిపై హెచ్ఎంను ప్రశ్నించగా పొంతన లేని సమాధానాలు చెప్పడంతో ఆగ్రహం వ్యక్తం చేశారు.
అపరిశుభ్ర వాతావరణం: పాఠశాల ఆవరణంతో పాటు భోజనం తయారుచేసే వంటగది అపరిశుభ్రంగా ఉండటాన్ని తీవ్రంగా పరిగణించారు.
పౌష్టికాహారం అందించాల్సిందే:
ఈ సందర్భంగా ఎంఈఓ మాట్లాడుతూ.. పాఠశాల ప్రధానోపాధ్యాయులు ప్రతీ విషయంలో క్షుణ్ణంగా పరిశీలిస్తూ జవాబుదారీతనంతో వ్యవహరించాలని ఆదేశించారు. "హాజరైన విద్యార్థులందరికీ నియమావళి ప్రకారం కోడిగుడ్లు, అరటిపండ్లు ఖచ్చితంగా అందజేయాలి. వంట మనుషులు పరిశుభ్రత పాటిస్తూ తప్పనిసరిగా చేతులకు గ్లౌజులు ధరించాలి" అని స్పష్టం చేశారు. ఉపాధ్యాయులు సమయపాలన పాటిస్తూ బోధనపై ప్రత్యేక శ్రద్ధ వహించాలని సూచించారు.
ఈ కార్యక్రమంలో పాఠశాల విద్యా కమిటీ చైర్మన్ కొర్ర వెంకటేష్ నాయక్, ఉపాధ్యాయులు పాల్గొన్నారు.