దేవాదాయ శాఖ కమిషనర్కు వీరశైవ సంక్షేమ సమాజం వినతి
స్థానిక చారిత్రక పుణ్యక్షేత్రమైన గవి మఠం సమగ్ర అభివృద్ధికి రూ. 5 కోట్ల నిధులు మంజూరు చేయాలని వీరశైవ సంక్షేమ సమాజం నాయకులు దేవాదాయ శాఖ రాష్ట్ర కమిషనర్ రామచంద్ర మోహన్కు విజ్ఞప్తి చేశారు. మఠాన్ని సందర్శించిన కమిషనర్ను సమాజం ప్రతినిధులు మర్యాదపూర్వకంగా కలిసి, క్షేత్ర పరిధిలో చేపట్టాల్సిన పలు అభివృద్ధి పనులపై సుదీర్ఘంగా చర్చించి ఒక వినతిపత్రాన్ని సమర్పించారు.
ఈ సందర్భంగా సమాజం పెద్దలు మాట్లాడుతూ.. గవి మఠానికి నిత్యం వచ్చే భక్తుల సౌకర్యార్థం తగినన్ని గదులు లేక తీవ్ర ఇబ్బందులు పడుతున్నారని, వెంటనే అత్యాధునిక వసతి గృహాన్ని (ఛౌల్ట్రీ) ఏర్పాటు చేయాలని కోరారు.
వినతిపత్రంలో పేర్కొన్న ప్రధాన డిమాండ్లు:
రథోత్సవానికి శాశ్వత వేదిక: ప్రతి ఏటా వైభవంగా జరిగే రథోత్సవానికి శాశ్వత నిర్మాణాన్ని చేపట్టాలి.
భవ్య ముఖద్వారం: అనంతపురం జాతీయ రహదారి (హైవే) నుండి స్పష్టంగా కనిపించేలా 'కరి బసవ రాజేంద్రమహా స్వామి' ముఖద్వారాన్ని నిర్మించాలి.
60 అడుగుల సీసీ రోడ్డు:* గవి మఠం నుండి ఎదురు బసవన్న గుడి వరకు 60 అడుగుల వెడల్పుతో సీసీ రోడ్డు నిర్మించి, రోడ్డుకు ఇరువైపులా మొక్కలు నాటి సుందరీకరించాలి.
మౌలిక వసతుల కల్పన: క్షేత్రానికి వచ్చే భక్తుల కోసం మౌలిక సదుపాయాలు మెరుగుపరచడంతో పాటు, మఠాన్ని ప్రముఖ ఆధ్యాత్మిక కేంద్రంగా తీర్చిదిద్దాలి.
ఆస్తుల పరిరక్షణ:మఠానికి సంబంధించిన భూములు, ఇతర ఆస్తులను దేవాదాయ శాఖ ఆధ్వర్యంలో పూర్తి స్థాయిలో పరిరక్షించాలి. ఈ వినతిపత్రంపై కమిషనర్ సానుకూలంగా స్పందిస్తూ, మఠం అభివృద్ధికి తన వంతు కృషి చేస్తానని హామీ ఇచ్చారు.
ఈ కార్యక్రమంలో వీరశైవ సంక్షేమ సమాజం అధ్యక్షులు నాగన్న గౌడ్, కార్యదర్శి నిరంజన్ గౌడ్, ప్రముఖ నాయకులు చంద్రమౌళి, బొజ్జప్ప, రాకెట్ల మఠం వీరస్వామి, టీచర్ లోకేష్, తిప్పే స్వామి తదితరులు పాల్గొన్నారు.