ఉరవకొండ భూముల అక్రమాలు.. 3 రోజుల్లో నివేదికకు ఆదేశాలు

అనంతపురం: అనంతపురం జిల్లా ఉరవకొండ గ్రామ పంచాయతీ పరిధిలో జరిగిన భూముల అక్రమ కేటాయింపుల వ్యవహారం మరింత తీవ్రమైంది. ఈ అంశంపై స్పందించిన ఆంధ్రప్రదేశ్ లోకాయుక్త, రాష్ట్ర పంచాయతీ రాజ్ మరియు గ్రామీణాభివృద్ధి శాఖ అధికారులను వెంటనే చర్యలు తీసుకోవాలని ఆదేశించింది.
ఉరవకొండకు చెందిన మీనుగ మధు బాబు దాఖలు చేసిన ఫిర్యాదు (నెం. 2556/2021/B2)పై ఉన్నతాధికారులు సీరియస్‌గా స్పందించారు. ఈ నేపథ్యంలో సంబంధిత శాఖలు అక్రమంగా తీసుకున్న తీర్మానాలను రద్దు చేయాలని స్పష్టం చేశారు.
ఆంధ్రప్రదేశ్ పంచాయతీ రాజ్ చట్టం, 1994లోని సెక్షన్ 246 ప్రకారం, గ్రామ పంచాయతీ తీసుకున్న అక్రమ నిర్ణయాలను వెంటనే రద్దు చేయాలని కమిషనర్ కార్యాలయం ఆదేశించింది. అలాగే అక్రమంగా కేటాయించిన భూములను తిరిగి గ్రామ పంచాయతీ స్వాధీనంలోకి తీసుకోవాలని, వాటికి కంచె ఏర్పాటు చేసి రక్షణ చర్యలు చేపట్టాలని సూచించింది.
ఈ వ్యవహారంలో బాధ్యులపై కఠిన చర్యలు తీసుకోవాలని కూడా ఆదేశాలు జారీ అయ్యాయి. ముఖ్యంగా అప్పటి సర్పంచ్‌లు, సంబంధిత అధికారులపై తీసుకున్న చర్యల వివరాలను సమగ్ర నివేదికగా సమర్పించాలని కోరారు.
ఇప్పటికే నాలుగు సార్లు మెమోలు జారీ చేసినప్పటికీ నివేదికలు అందకపోవడంతో కమిషనర్ కార్యాలయం అసహనం వ్యక్తం చేసింది. తాజా లేఖను “అత్యంత అత్యవసరం”గా గుర్తించి, ఇది ఐదవ రిమైండర్‌గా జారీ చేసినట్లు అధికారులు తెలిపారు.
ఈ పరిణామాల నేపథ్యంలో అనంతపురం జిల్లా పంచాయతీ అధికారి టి. నాగరాజ నాయుడు రంగంలోకి దిగారు. గుంతకల్లు డివిజనల్ పంచాయతీ అధికారి, ఉరవకొండ ఎంపీడీఓ, పంచాయతీ కార్యదర్శికి తక్షణ ఆదేశాలు జారీ చేశారు.
“లోకాయుక్తకు సంబంధించిన కేసు కావడంతో దీనికి అత్యున్నత ప్రాధాన్యత ఇవ్వాలి. ఎట్టి పరిస్థితుల్లోనూ మూడు రోజుల్లోగా పూర్తి స్థాయి చర్య తీసుకున్న నివేదికను రికార్డులతో సహా సమర్పించాలి” అని జిల్లా పంచాయతీ అధికారి స్పష్టం చేశారు.
ఈ ఆదేశాలతో ఉరవకొండలో అక్రమ భూ కేటాయింపులకు పాల్పడిన వారిలో ఆందోళన నెలకొంది. ప్రభుత్వ భూములను తిరిగి స్వాధీనం చేసుకోవడంలో అధికారులు ఎంతవరకు విజయవంతమవుతారో చూడాల్సి ఉంది.