విడవలూరు, ఏప్రిల్ 21: నెల్లూరు జిల్లా విడవలూరు మండలంలోని ఊటుకూరు పెద్దపాళెం గ్రామ మత్స్యకారులు తమ కొత్త నాయకత్వాన్ని ఏకగ్రీవంగా ఎన్నుకున్నారు. గ్రామ మత్స్యకార సంఘం పెద్ద కాపుగా ఆడంగారి కనకయ్య, నడిం కాపుగా కొండూరు ఏడుకొండలు, చిన్న కాపుగా కొండూరు అమరేంద్ర, క్యాషియర్గా పాపారావు ఎన్నికయ్యారు. వీరితో పాటు మరో ఆరుగురు ప్రముఖులను గ్రామ పెద్దలుగా ఎంపిక చేశారు.
నూతనంగా బాధ్యతలు స్వీకరించిన ఈ నాయకులు నెల్లూరు నగరంలోని మాగుంట లేఅవుట్లో కోవూరు ఎమ్మెల్యే Vemireddy Prasanthi Reddy ను వారి క్యాంప్ కార్యాలయంలో మర్యాదపూర్వకంగా కలిశారు. ఈ సందర్భంగా ఎమ్మెల్యే కొత్తగా ఎన్నికైన కాపులు మరియు మత్స్యకార పెద్దలకు అభినందనలు తెలిపారు.
ఎమ్మెల్యే సమక్షంలో తెలుగుదేశం పార్టీ నాయకులు బెజవాడ వంశీకృష్ణారెడ్డి మత్స్యకార పెద్దలను పూలమాలలు, శాలువాలతో ఘనంగా సన్మానించారు. ఈ సందర్భంగా ఎమ్మెల్యే ప్రశాంతి రెడ్డి మాట్లాడుతూ, మత్స్యకారుల సమస్యల పరిష్కారం, వారి ఆర్థికాభివృద్ధి కోసం కొత్త కార్యవర్గం అంకితభావంతో పనిచేయాలని సూచించారు.
అదేవిధంగా, మత్స్యకారులకు ప్రభుత్వం అందించే సంక్షేమ పథకాలు సకాలంలో అందేలా తాను కృషి చేస్తానని హామీ ఇచ్చారు. ఈ కార్యక్రమంలో కాపులు, మత్స్యకార నాయకులు, గ్రామస్తులు పెద్ద సంఖ్యలో పాల్గొన్నారు.